თბილისის ყოფილი მერი ვანო ზოდელავა ავარიაში მოყვა - მისი მდგომარეობა მძიმეა

ვანო ზოდელავა ავარიაში მოყვა, - ინფორმაციას facebook-ზე გვერდზე მისი მეგობარი ზაზა შენგელია ავრცელებს.

შენგელიას თქმით, თბილისის ყოფილი მერის ჯანმრთელობის მდგომარეობა მძიმეა.

„დღეს ღამით, ჩემი უახლოესი მეგობარი ვანიკო ზოდელავა, მარჯვენა საჭიანი ტაქსით აზერბაიჯანის საზღვრიდან თბილისისკენ მომავალი, საშინელ ავტოკატასტროფაში მოჰყვა და მისი სიცოცხლე კითხვის ნიშნის ქვეშაა, იმ მანქანის მძღოლი რომელსაც ეს ტაქსი შეეჯახა - გარდაიცვალა და მარჯვენა საჭიანი ტაქსის მძღოლმა, რომელშიც ვანიკო იჯდა, მსუბუქი დაზიანებები მიიღო“, - წერს შენგელია.

შეგახსენებთ, ქვემო ფონიჭალაში გუშინ, გვიან ღამით, ერთმანეთს სამი მსუბუქი ავტომობილი შეეჯახა. შედეგად, 1 ადამიანი ადგილზე გარდაიცვალა, 2 კი დაშავდა. ისინი საავადმყოფოში გადაიყვანეს.

მომხდარზე გამოძიება სსკ-ის 276-ე მუხლის მეხუთე ნაწილით მიმდინარეობს, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს, რამაც ადამიანის სიცოცხლის მოსპობა გამოიწვია.