„გირჩმა“ საპრეზიდენტო არჩევნებზე საკუთარ კანდიდატად ზურაბ ჯაფარიძე დაასახელა

„გირჩი“-ს საპრეზიდენტო კანდიდანტი ზურაბ ჯაფარიძე იქნება.

ჯაფარიძეს თქმით,იმ შემთხვევაში თუ საპრეზიდენტო არჩევნებში გაიმარჯვებს, საქართველოში მომდევნო 5 წლის განმავლობაში ბევრი მნიშვნელოვანი ცვლილება განხორციელდება. 

ჯაფარიძემ აღნიშნა, რომ  „გირჩმა“ უკვე შეძლო გარკვეული ცვლილებების შეტანა, ყოველგვარი თანამდებობების გარეშე.

„პრეზიდენტს მნიშვნელოვანი ცვლილებების განხორციელება შეუძლია. დღეს პრეზიდენტის უფლებამოსილება ცხადია, რომ შეზღუდულია და მომავალ პრეზიდენტს ვერ ექნება გავლენა ბევრ სფეროზე, მაგრამ არ დაიჯეროთ, რომ მას არ ექნება საკმარისი ბერკეტები დიდი ცვლილებებისთვის. როგორც თავდაცვაზე მთავარი პასუხისმგებელი, ყველაფერს გავაკეთებ, რომ მომავალი 5 წლის განმავლობაში თავდაცვის დაფინანსება გაორმაგდეს. სრულად გავაუქმებ სამხედრო-სავალდებულო სამსახურს და ეს იქნება პირდაპირ პრეზიდენტის კომპეტენცია. შეწყალების უფლების გამოყენებით შევიწყალებ ყველას, ვისაც რაიმე სასჯელი აქვს დაკისრებული ნარკოდანაშაულის გამო იქამდე ვიდრე ხელისუფლება არ დათანხმდება ადამიანურ ნარკოპოლიტიკას. ვეტოს უფლებით გავაჩერებ მავნებლური კანონების მიღებას ანუ პრაქტიკულად ყველა კანონს, რომელიც იქნება თავისუფლების შემზღუდავი, ვივლი ასეთი კანონების განხილვაზე საქართველოს პარლამენტში და დავიცავ საღ აზრს 150 პარლამენტარის წინაშე. თვეში ერთხელ, სათითაოდ შევხვდები ყველა მინისტრს და გამოვკითხავ თუ რას აკეთებს, რაში ხარჯავს ხალხის ფულს და ამ ყველაფრის ჩვენება მოხდება Facebook Live-ით“, - განაცხადა ჯაფარიძემ „ფეისბუქ“ მიმართვაში.

ასევე, ჯაფარიძეს თქმით, ქვეყანას სანსი აქვს რომ რადიკალურად გააუმჯობესოს ტავისი მდგომარეობა.

„საჭიროა „გირჩი“ საპრეზიდენტო სასახლეში. მე არ გპირდებით, რომ ვიქნები მესია, რომელიც მოგიგვარებთ ყველაფერს. ვინმემ შესაძლოა ჩემზე უკეთ გააკეთოს ბევრი საქმე, ვინმემ შესაძლოა უკეთ გაიკეთოს ჰალსტუხი, უკეთ გადმოსცეს აზრები, მაგრამ სხვებისგან განსხვავებით, მე ვარ ისეთი ადამიანების გარემოცვაში, რომლებიც ჩემსავით მზად არიან დახარჯონ წლები ჩვენი საერთო მიზნებისთვის. დღეს, დროის ამ კონკრეტულ მომენტში, მე ვარ მზად ამ დისტანციის გასარბენად, თუმცა ამის გაკეთება შეგვიძლია ერთად. დღევანდელი რეალობის სხვა ალტერნატივა „გირჩის“ გარდა არ არსებობს, „მატრიცაში“ რომ ნეოა, ესაა სინამდვილეში ამ ქვეყნისთვის „გირჩი“,- აღნიშნა ჯაფარიძემ.