პრეზერვატივის საქმე სტრასბურგში მიდის - რა მორალის დაწესება უნდა ქართულ ამორალურ სასამართლოს?

თბილისის საქალაქო სასამართლომ პრეზერვატივების ქართულ კომპანია “აიისას” საქმეზე გადაწყვეტილება გამოაცხადა. “აიისა” სამართალდამრღვევად ცნეს და 500 ლარის გადახდა დააკისრეს. სასამართლომ მიიჩნია, რომ ორ თითზე წამოცმული პრეზერვატივის გამოსახვა არაეთიკური რეკლამაა.

“აიისას” ინტერესებს სასამართლოში “საქართველოს დემოკრატიული ინიციატივის” წარმომადგენელი, იურისტი გიორგი მშვენიერაძე იცავს. მისი თქმით, სასამართლოს გადაწყვეტილება საქართველოში გამოხატვის თავისუფლების ცენზურის კუთხით საშიშ პრეცენდენტს ქმნის .

თბილისის სააპელაციო სასამართლომ ძალაში დატოვა პრეზერვატივების კომპანია აიისას საქმეზე პირველი ინსტანციის გადაწყვეტილება.

ამის შესახებ კომპანიის დამფუძნებლის, ანანია გაჩეჩილაძის ადვოკატმა, გიორგი მშვენიერაძემ განაცხადა. მისივე ცნობით, გასაჩივრების შესახებ გადაწყვეტილებას მას შემდეგ მიიღებენ, რაც სამოტივაციო ნაწილს ჩაიბარებენ.

"მურუსიძემ ძალაში დატოვა აიისა • aiisa-ს საქმეზე საქალაქო სასამართლოს მიერ მიღებული გადაწყვეტილება. ჯერ არ ჩაგვბარებია, მაგრამ ალბათ მანაც დაინახა ამ გვირგვინში ეროვნული ღირსება. შევხვდებით სტრასბურგში"- განაცხადა გიორგი მშვენიერაძემ.

თბილისის საქალაქო სასამართლოს შეფასებით, ანანია გაჩეჩილაძის მიერ “აიისას” ოფიციალურ ფეისბუკ გვერდზე და ასევე წარმოებულ პროდუქტებზე განთავსებული რეკლამები თავისი წარწერებით და გამოსახულებებით არაეთიკურია, რომელიც რელიგიის მიმართ შეურაცხმყოფელი სიტყვებისა და შედარებების (გამოსახულებები) გამოყენებით არღვევს საყოველთაოდ აღიარებულ ჰუმანურ და ზნეობრივ ნორმებს, ხელყოფს რელიგიურ სიმბოლოებს, ასევე რეკლამები თავის წარწერებითა და გამოსახულებებით ხელყოფს ეროვნულ და ისტორიულ საგანძურს, ძეგლებს.